|| దృశ్యం న్యూస్ ||
నిజామాబాద్ జిల్లా ఎడపల్లి మండలంలో అల్ ఇండియా బంజారా సేవ సంఘం (AIBS) మండల స్థాయి నూతన కమిటీ ఎన్నికలు శాంతియుత వాతావరణంలో నిర్వహించబడ్డాయి. ఈ ఎన్నికలు జిల్లా పర్యవేక్షకుడు తరాచంద్, మండల ఎన్నికల అధికారి మున్య నాయక్ ఆధ్వర్యంలో వడ్డేపల్లి గ్రామంలోని జగదాంబ మాత సేవాలాల్ మహరాజ్ ఆలయంలో జరిగాయి.
ఈ సందర్భంగా మున్య నాయక్ మాట్లాడుతూ, మండలంలోని వివిధ గ్రామాల బంజారా సమాజ నేతలతో చర్చించి, ఐక్యతకు ప్రాధాన్యతనిస్తూ కమిటీ ఎంపిక చేశామని చెప్పారు. బంజారా సమాజ అభివృద్ధి, ఐక్యత మరియు సేవల వృద్ధి లక్ష్యంగా కమిటీ ఏర్పాటయ్యిందని తెలిపారు.
ఈ కమిటీకి అధ్యక్షుడిగా ఎన్నికైన మెగావత్ గంగాధర్ మాట్లాడుతూ, “నాపై చూపిన విశ్వాసానికి కృతజ్ఞతలు తెలుపుతూ, కమిటీ సభ్యులతో కలిసి AIBS అభివృద్ధికి పూర్తి నిబద్ధతతో పనిచేస్తాను” అని వెల్లడించారు. అదేవిధంగా జిల్లా కమిటీకి, తనకు తోడ్పడుతున్న ప్రతి సభ్యుడికి ధన్యవాదాలు తెలిపారు.
