|| దృశ్యం న్యూస్ ||
తెలంగాణ రాష్ట్ర ప్రభుత్వం ఈ సంవత్సరం సమగ్ర ఇంటింటి కుటుంబ సర్వే నిర్వహించడానికి అన్ని ఏర్పాట్లు పూర్తి చేసింది. ఈ సర్వేలో ప్రతి కుటుంబం నుండి సామాజిక, ఆర్థిక, విద్య, ఉపాధి, కుల, రాజకీయ పరిస్థితుల వంటి వివిధ అంశాలపై సమాచారం సేకరించబడుతుంది.
సమగ్ర ఇంటింటి కుటుంబ సర్వే నేటి నుంచి అనగా నవంబర్ 6 నుంచి 30 వరకు రాష్ట్రవ్యాప్తంగా ఈ కార్యక్రమం నిర్వహించనున్నారు, నేటి నుంచి ఈనెల 8 వరకు మూడు రోజులపాటు ఇండ్ల జాబితా నమోదు కార్యక్రమం చేపట్టనున్నారు, గ్రామ పంచాయతీ/ మున్సిపాలిటీ పరిధిలోని గ్రామం (ఆవాసం) పేర్లను కోడ్ రూపంలో సేకరిస్తారు. వార్డు నంబర్, ఇంటి నంబర్, వీధి పేరు కూడా ఇండ్ల జాబితాలో నమోదు చేసి ప్రతి ఇంటికి స్టిక్కర్ అంటిస్తారు.
ఈ నెల 9 నుంచి ప్రభుత్వం ముద్రించిన వివరాల ప్రకారం కుటుంబ వివరాలను ఎన్యూమరేటర్లు సేకరించి నమోదు చేస్తారు.
ఈ సర్వేకు సంబంధించిన ప్రశ్నలు, సమాధానాలు, అవసరమైన పత్రాలు మరియు సమాచార సేకరణ విధానం గురించి వివరించబోతున్నాము.
సమగ్ర కుటుంబ సర్వే గురించి అవగాహన :
ఈ సర్వేలో మొత్తం 75 ప్రశ్నలతో ఉంటే, 56 ప్రశ్నలు ప్రధానంగా, 19 ప్రశ్నలు అనుబంధంగా ఉంటాయి, ఈ ప్రశ్నలు రెండు పార్టులుగా విభజించబడ్డాయి,
మొదటగా కుటుంబ యజమాని మరియు సభ్యుల వ్యక్తిగత వివరాలు సేకరించబడతాయి. ఇందులో సామాజిక, విద్య, ఉపాధి, భూమి వివరాలు, రిజర్వేషన్ ప్రయోజనాలు, వలసలు, రాజకీయ సమాచారం అడుగుతారు.
రెండవది కుటుంబ వివరాలను, భూమి వివరాలను, వ్యవసాయ సంబంధిత సమాచారాన్ని వగైరా అడుగుతారు.
సర్వే ప్రశ్నలు: ముఖ్యమైన అంశాలు
1. కుటుంబ యజమాని మరియు సభ్యుల వివరాలు:
కుటుంబ యజమాని పేరు, వయస్సు, లింగం, మతం, సామాజిక వర్గం, మాతృభాష, ఆధార్ కార్డు నెంబర్, మొబైల్ నెంబర్ తదితర వివరాలు అడగబడతాయి.
– సభ్యుల మధ్య సంబంధం (తల్లిదండ్రులు, పిల్లలు, ఇతర సభ్యులు) కూడా నమోదు చేయాలి.
– వైవాహిక స్థితి, దివ్యాంగం వంటి వివరాలు కూడా పొందుతారు.
2. భూమి వివరాలు :
– ధరణి ఖాతా నెంబర్, భూమి రకం (మెట్ట, తరి, పడావు), ఎకరాలు, గుంటల వివరాలు అడుగుతారు.
– సాగు విస్తీర్ణం, నీటి పారుదల వనరులు, కౌలు భూమి వివరాలు కూడా పొందుతారు.
3. విద్యా, ఉపాధి మరియు ఆదాయ వివరాలు:
– మీరు చదివిన పాఠశాల, చదువుకున్న డిగ్రీలు, ఉపాధి ప్రాప్తి, వ్యాపార, ఉద్యోగం సంబంధిత సమాచారాన్ని అందించాలి.
– ప్రస్తుతం మీరు చేస్తున్న ఉద్యోగం, వృత్తి, వార్షిక ఆదాయం, బ్యాంకు ఖాతా వగైరా వివరాలు నమోదు చేయాలి.
– అదనంగా, ఉపాధి నిషేధిత కుల వృత్తులను కొనసాగిస్తే, సంబంధిత సమాచారాన్ని కూడా ఇవ్వాలి.
4. సామాజిక మరియు రాజకీయ వివరాలు:
– ఎస్ఏస్ఈ, ఎస్టీ, బీసీ, ఈడబ్ల్యూఎస్ రిజర్వేషన్ ప్రకారం ప్రయోజనాలు పొందిన వారు, వారికి సంబంధించిన ధ్రువపత్రాల వివరాలు నమోదు చేయాలి.
– ప్రజా ప్రతినిధిగా పని చేసిన విషయాలు, పూర్వ ప్రభుత్వ పథకాలు మరియు ఇతర రాజకీయ వివరాలు సేకరించబడతాయి.
5. కావలసిన ప్రముఖ పత్రాలు:
– ఆధార్ కార్డు, ధరణి పాస్ పుస్తకాలు (రైతులకు) తదితర పత్రాలు అవసరం కావచ్చు. సర్వే సమయంలో పత్రాలు ఇవ్వాలని లేదా ఫొటోలు తీసుకోవాలని లేదు, కేవలం వివరాలు అందించడమే ప్రధాన ఉద్దేశం.
– రేషన్ కార్డు నెంబర్, పాత వలసలు, వ్యవసాయరంగం, పశుసంపద, గణన,
– వికలాంగులు ఉంటే సంబంధిత పత్రాలు,
వంటి వివరాలు కూడా ఇవ్వాలి.
6. వలస వివరాలు :
– ఒక కుటుంబం లేదా వ్యక్తి ఎవరైనా ఇతర దేశాలకు లేదా రాష్ట్రాలకు, ఇతర ప్రదేశాలకు వలస వెళ్ళినట్లయితే, స్థానికంగా వుండే వారు వారికి సమాచారం అందించాలి, వారి వద్ద నుండి వలస కారణాలు, గమ్యం, వలస సమయం మరియు వలసకి సంబంధించిన ఇతర వివరాలు సేకరించబడతాయి.
గోప్యత మరియు సురక్షత :
ఈ సర్వేలో సేకరించిన సమాచారాన్ని పూర్తిగా గోప్యంగా ఉంచుతారు. మీరు ఇచ్చిన వివరాలను ఎవరూ ఇతరులు చూసే అవకాశం లేదు. ఇంటింటి సర్వే ద్వారా సేకరించిన సమాచారం వాస్తవమైనదే కావాలి. అంగీకరించిన సమాధానాలు తప్పుగా ఇచ్చినట్లయితే, వేరే సమస్యలు ఏర్పడవచ్చు.
తాత్కాలిక సారాంశం :
రాష్ట్ర ప్రభుత్వం సమగ్ర ఇంటింటి కుటుంబ సర్వే ద్వారా ప్రజల గురించి అవసరమైన సమాచారాన్ని సేకరించాలని ఉద్దేశించింది. ఈ సర్వేను సులభతరంగా పూర్తి చేయడం కోసం, సంబంధిత పత్రాలు దగ్గర ఉంచుకుని సమాధానాలను నిజమైన, సరిగ్గా అందించడం అవసరం.
