|| దృశ్యం న్యూస్ ||
నిజాంసాగర్ ప్రాజెక్ట్ పరివాహక ప్రాంత ప్రజలు అప్రమత్తంగా ఉండాల్సిన అవసరం ఉందని నీటిపారుదల శాఖ అధికారులు ఈరోజు సాయంత్రం ప్రకటన విడుదల చేశారు. నిన్న రాత్రి నుండి ఎడతెరిపి లేకుండా కురుస్తున్న భారీ వర్షాల కారణంగా ప్రాజెక్టులో నీటి మట్టం వేగంగా పెరుగుతోంది. దీనితో వరద నియంత్రణ చర్యలలో భాగంగా 20 బెడ్ వరద గేట్ల ద్వారా భారీగా నీటిని విడుదల చేస్తున్నారు.
అధికారులు హెచ్చరిస్తూ, నిజాంసాగర్ ప్రాజెక్ట్ క్రింది పరివాహక ప్రాంత గ్రామాల ప్రజలు నది పరిసరాలకు వెళ్లకుండా జాగ్రత్తలు పాటించాలని సూచించారు. వరద ప్రవాహం కారణంగా వాగులు, వంకలు ఉధృతంగా ప్రవహించే అవకాశం ఉన్నందున, స్థానికులు అప్రమత్తంగా ఉండాలని, అవసరమైతే సురక్షిత ప్రాంతాలకు వెళ్లాలని విజ్ఞప్తి చేశారు.
ప్రాజెక్టు వరద గేట్ల ద్వార నీటివిడుదల కొనసాగుతున్నందున, రైతులు, మత్స్యకారులు మరియు పశువులను కాపాడే వారు నది పరిసర ప్రాంతాలకు వెళ్లకుండా జాగ్రత్తలు తీసుకోవాలి అని తెలిపారు. ప్రభుత్వం మరియు నీటిపారుదల శాఖ తరచుగా సమాచారం అందజేస్తూ పరిస్థితిని సమీక్షిస్తున్నాయి. ప్రజల ప్రాణ భద్రతే తమ ప్రాధాన్యం అని అధికారులు స్పష్టం చేశారు.
